कहाँ होली नुमाफुङ ?

किरण सुब्बा

जब कञ्चनजङगा र फक्ताङलुङको पबित्र शिरबाट
आस्थाका सुनौलो किरणहरु पोखिन थाल्छन्
म त खोज्छु उनको आकृति यतै कतै,
तीनजुरे र सन्दकपुरको प्राकृतिक छटाहरुमा
गाउँ-बेंसी र माइती घरको न्यानो स्पर्शहरुमा
सायद विजयपुर र मोराहाङगको उर्बर फाँटमाथि
गरिब किसानको सपना बोकी झुलेकी छिन्,
निस्फिक्री धानको बाला बनी नुमाफुङ

जब काटिन लागेको हिमालको शिर देख्छु
बाडिन लागेको पुज्य भूमिको मर्म सुन्छु,
तराईका स्थिर पाउहरु दक्षिण खिंचिएका पाउछु
खोज्छु उनलाई महाकाली र मेचीका अंगालोभित्र,
तर सतलज र टिस्टामा बगेका साइनो खोज्दै,
अमरसिंग, बलभद्र र कांगसेरोका बीरता बिउताउन
कांगरा र पूर्णियाका हाम्रा ऐतिहासिक धरोहरमाथि
फुलेकी होली राष्ट्र भक्तिको प्रतिक बनी नुमाफुङ

जब रोजगारी, अवसर र उन्मुक्तिको खोजीमा
सुन्दर सपनाहरु बुनी युवा लाहुर लाग्छन् ,
बिछोडले न्यास्रो बनेको गाउँ बस्ती र मांगहिमहरुमा
खोज्छु उनलाई च्याब्रुङ, मादल र सारंगीको धुनसगैं
हाक्पारे, सोरठी, चुटका र झ्याउरे भाकाहरुमा ,
देख्छु कि कतै आमाबुबा र चेलीको मुस्कानभित्र
सायद पारिवारिक मिलनको मिठो पल उन्दै,
पर्खेकी होली लालीगुराँस सजाई डाँडाभरि नुमाफुङ

लण्डन, बेलायत
तारिक: ८ जनुअरी २०१०