फक्ताङ्लुङमेल्ले कुदुख्खेन

नगेन्द्र ईङनाम "आठराईली"

फक्ताङ्लुङमा ए !
मिङ्लेङमा ओ याप्मी हा:रे
पनु नुबा खेने केमिङिन
कुम्भकर्ण नु कन्चनजङघा मेईसुआङ
अख्खेलरिक केम्ईगे ई
थप्मा मेन्छुकमेन्छुक् केदुक्ल केवा
याक्थुङ लाजेन केधप्पा
केभक्ताङिन मेनिसुआङे
कन्चनजङघा केमिङ मेजोगुईया
याक्थुङ लाजेदाङ्बा हा:रे निङ्वानकुसिक
से से दाङ्बा केम्निसेआङे
कन्चनजङघाआङ केम्मेतेबा ई या
निस्से रो,
निस्से रो हो, फक्ताङ्लुङमा ए !
केईङिन क यो सिराधाङे
केजन्निनाङ सिराधाङे,
कर केमिङीन सिरा मेधाङेन
ओ कप्मो ओ
मिङ्लेङमा रे केदुख्खेन् ग वा ए वा
फक्ताङ्लुङमा ए मेप्मा केगोप्पा हा
खेने नु लेयाङ चारिक
निङ्वा तुख्खे ओ मवा,

फक्ताङ्लुङमा ए !
केमिक तगाङबा हा नु
केभक्ताङमो केयुङ्बा केरेक्ले
खुन्छि सक्मान् ने केम्ईत्ते,
खुन्छि ईङिन्ने केम्ईत्ते
लाङघेक्नु लाङघेक्नु मेबेगेल्ले
लामतुख्खे हा मेघोसुसाङ
केमिङिन मेईत्तुआङ
खुन्छि मुईन मेभुक्सु
निस्से रो,
निस्से रो हो, फक्ताङ्लुङमा ए !
केमनाहा:नु खेनेईन्
आभेल्याङ मेम्बुप्ना का:ई वा
हेक्याङ्सा फक्ताङ्लुङमा केमिङ ओ
चन्जननु नु हाङ्हाङ् मेईत्छिङ
कुम्भकर्ण नु कन्चनजङघा केम्मेतिल्ले
सोसोरिक खुन्छि निङ्वानाङ तुक
अक्केलरिक मिङलेङमा रे तुख्खेन
अभङे खेने नु ग वा ए वा
फक्ताङलुङमा ए खेम्मा केगोप्पा
केरेक् खेने केयाप्मी हा:आङ
सारिक्के निङ्वा तुख्खे ओ मवा,

फक्ताङ्लुङमा ए !
कुम्भकर्ण नु कन्चनजङघा केम्जोग्याङ
अख्खेलरिक आनि आमईगे
याक्थुङलाजे रे साम्जिकिन्ने ईरेयाङ वा
ओ आम्भा कप्मो ओ
याक्थुङलाजे ताङ्बा हा:रेन्
खुन्छि सेम्लाप्मा वा
खेने केमिङिन -
खुन्छि मेईत्तुबा ए ईसिक
फक्ताङ्लुङमा ए पोख्खेल्ले
थेमान् फेल्लार बा मु बे ?
कर अख्खे मेबोखेन्नाङ्
के ईङिन् फेत्लारे बा ओ
कुम्भकर्ण नु कन्चनजङघा
केउप्मा मिङ पोखेबा ओ
खेने केमिङ ओ केहिङ्बा हा
केरक ए निङ्वा तुख्खे ओ मवा
अक्केरिक मिङ्लेङमा रे तुख्खेन
अभङे खेने नु ग वा ए वा
केमिङ् ओ केसप्पा हा आङ्
चारिक्के निङ्वा तुख्खे ओ मवा !!