मा: लाम्मीन्

सेसेहाङ् फियाक लिम्बू

आङ्गा? लाङघेक्काबा आलाम्हा?
आम्बा-आम्मासिरे मा: लाम्मीन्
मेजोगु मेधआङ् नेस्सेबा,
खाम्लाधाआङ् लोक्मा मेसुक्ल फा?आङ्
अन्हा?आङ् लाङघेक्मा मेसुक्ल फा?आङ्
सिक्चो, फे?बात् केरेक्-केरेक्
लाङघेक्मा उस्स्रु मेबोङ्ल फा?आङ् ।
आल्लो हेन् मा: लाम्मीन्
थुक्वारे ए पक्खु ते?रुबी ?
लुन्देआङ् ने हत्छे-वत्छे सेरेपेबी ?
खाम्लाधाआङ् हे?यो मेन्लोक्नेन्
सिक्चो-फे?बात्हा?आङ् लाङमेन्घेक्कीन्
थक्सा-पुसाहा?आङ् लाङमेन्घेक्कीन्
आलाङ्योक्खा,आङ् हे?यो तगी मेबोनेन्
नोरिक्काङ् मिक्चो म:र्इ
आम्बा-आम्मासिरे तयेत्छुबा मा: लाम्मीन्
निङ्वा? इत्तुङ्ल ओमेत्तुङ्-
मनाहा?रे लाङघेक्मा मेलेरुआङधो
सुङ्लारे तिम्से पे रेत्छ,
थाक्पारे युक्नारक् पोक्खेरेत्छ,
किप्मा पघु-केघुबा
तिङ्ग्रेगलास्रक् पोक्खे पे रेत्छ,
पयम्-यम्बा सिगेबा-खिरेबाहा?
चुङमादेन्लक् पोक्खे पे रेत्छ ।
बा कन् निस्सेत्छुआङ्ङेबिला-
आसेप्माङमो? आम्बा-आम्मासी
थान्नेत्छीआङ् हाप्सीर-हाप्सीर
माङबान्नेत्छीर पात्छीरनेसी-
आस्सा ए, केत?यान् मिक्सी थोक्तेआङ् पत्
हारा तम्सीङ् चोगेआङ् सेप्तेलारेओ
हेने? लाङकेघेक्लफा?बा मास्लाम्मिन्
तिङगेक्ला रक् पोक्खेआङ् ने
हारा साक्तेआङ् लाङघेगेओ ।
तेदाप् ल?आआङ् निङ्वा? इत्छिङ्ङा
आम्बा-आम्मासी रे तयेत्छुबा लाम्मिन्
साक्माआङ् लाङघेक्मारे लागि
आर कुनुम्-थङ् चोक्मा पोङ् ।
कन् तेन्धङ्हा?ओ सिगेबाहा?आङ् सिमा मेसुक्,
थुम्लामिबा थङ्-इबुहा?आङ् पु?मा मेसुक्,
कुनुम्मो इनोगेन् खदेम्माङ् पोङमा सुक्
आङ्गा? थङ् ग चोक्मै पोङ् ।
हेक्याङ्लक्
आस्सा?आम्मेन्छाहा? तायेम्मो
कन् मा : लाम्मो उस्स्रुआङ् लाङ्घेक्मा मेघो
आम्बा नु आम्मासीरे लामतई इत्तेच्छुबा
निङ्वा?हा?आङ् कुसाङ्धो केत्मा मेघो ।

२०६०/१०/८, आर्बोटे, पान्थर ।