सेप्माङमो त्येर वयेओ

वीर नेम्बाङ

खेने
तगि-तगि ग
सेप्माङमो रक् केद्येर केवये
एगाङ-एगाङ ग
थक्वाओ आङ तामा केहेक्ते
कर
खेने सेप्माङमो केन्द्येनेन्निल्ले
आक्खेन आरुङमा हिप्से मेन्वि ?
खेने थक्वाओ केन्द्येनेन्निल्ले
आक्खेन आयोम पुःरे मेम्वि ?

खेल्लेसा
तुम्केदेप्पिमाङ-
कुभायेम इलामहाःओ ओमेत्ने
कर
खेप्मो ग खेने मेन्दुक्
कुभारे मिम्जिमाहाःरक् तुमुङसिङ
निकेदेप्पिमाङ-
कुभायेम हङग्रिवाहाः ओ सुक्ने
कर
खेप्मो ग खेने मेन्दुक्
कुभारे सिसामेत्हाः रक् निसुङसिङ

आल्ल रक् आङगा थाइङ पोक्खेग्नु
खेने ग ताक्थुङ मेन्दुक्
सेप्माङनि रेछ
खेने ग कुजाःइ मेन्दुक्
थक्वानि रेछ

खेल्ले चोगुल्ले
ताक्थुङद्यो केन्दानेन्छाङ
सेप्माङमो त्येर वयेओ
कुजाःइ केन्दानेन्छाङ
थक्वाओ त्येर वयेओ ।।

बरबोटे-३ इलाम, नेपाल